Om ’n instrument te kan bespeel is ’n lewensverrykende vaardigheid en voorreg waaraan te min kinders blootgestel word. Kleuterklassiek is ’n kindervriendelike groepsaktiwiteit waaraan ses tot agt kleuters op ’n slag deelneem. Kleuters tussen die ouderdom van vier en sewe kry die geleentheid om tydens die verloop van ’n jaar basiese kennis en vaardighede aan te leer vir verskillende instrumente, soos klavier, viool, blokfluit en slaginstrumente. Op hierdie manier word daar nie net waardering vir musiek by kinders gekweek nie, hulle leer ook lewenslange vaardighede aan.

Deur die kleuter bloot te stel aan verskillende instrumente, maak Kleuterklassiek dit moontlik om sy of haar belangstelling en aanleg te toets voordat duur instrumente aangekoop word. Aan die einde van die program kan aanbevelings gemaak word ten opsigte van toekomstige musieklesse op grond van die kleuter se ervaring van Kleuterklassiek. Kleuters wat reeds op ‘n vroeë ouderdom met Kleuterklassiek begin, kan ná die eerste jaar steeds aanhou met die program. Instrumente en musiek sal dan in meer diepte aangebied word.